Expourense acolle esta fin de semana a sexta edición de Antiq Auria, Feira Internacional de Antigüidades, que reunirá a 38 expositores de 5 países (España, Portugal, Suíza, Francia e Bélxica). É un ano máis un acto organizado pola Asociación “Memoria Antiga” de Ourense coa colaboración do recinto feiral de Ourense. O horario de apertura será o venres 7 de outubro de 16:00 a 21:00 horas. e o sábado 8 e o domingo 9 de outubro de 11:00 a 14:30 horas e de 16:00 a 21:00 horas. A entrada custa 2 euros e é gratuíta para os menores de 12 anos.
Antiq Auria propón unha viaxe ao pasado, dende o máis afastado (s. XVIII e XIX) ata os xa afastados anos 1980 e 1990, incluso. Miles de obxectos de pequeno e gran formato agardan unha nova vida na quinta edición de Antiq Auria. Este evento conta cun alto índice de fidelización dos expositores (ao redor do 90% repiten) e volverá converterse nun punto de encontro de nostálxicos, presentando obxectos únicos e cheos de historia divididos en tres sectores: antigüidades, coleccionismo e vintage.
Na sección de coleccionismo podes atopar obxectos de numismática, filatelia, militares e relixiosos, etc. Por último, este evento tamén conta cunha zona reservada aos afeccionados aos obxectos vintage (sec. XX), que se puxeron de moda e un referente á hora de decorar fogares ou negocios.
Nesta feira participan expositores de diversos puntos de España (Galicia, Asturias, Castela e León, Madrid e Andalucía) e de Portugal, así como expositores de Suíza, Francia e Bélxica que adoitan participar nos principais mercados de antigüidades centroeuropeos. O obxectivo de Antiq Auria, segundo indica "Memoria Antiga", é "poñer en valor o vello e que as persoas conserven e coiden as cousas antigas porque forman parte da súa historia". Ao mesmo tempo, queren promover o hábito de comprar antigüidades.
Durante esta quinta edición repetirase a “gran poxa”, que terá lugar o domingo 9 pola mañá a partir das 12:00 horas. Cada expositor entregará un obxecto a poxa entre o público asistente e cada un deles terá un prezo de saída de 5 euros. “Esta é unha boa oportunidade para conseguir pezas únicas a moi bo prezo”, explican os organizadores. Ademais, para premiar a fidelidade dos visitantes, sortearase entre todos eles unha antigüidade cedida polos organizadores.
