Movilizacións na agricultura

O SLG prepara mobilizacións para denunciar a prohibición de mercados labregos

A pesares de ser máis segura a compra neste tipo de feiras, hai gobernos municipais que decretan o seu peche sen que exista ningunha orde oficial que obrigue a facelo

Óscar Gómez

Ourense | 20.01.2021 08:52

O SLG prepara mobilizacións para denunciar a prohibición de mercados labregos
O SLG prepara mobilizacións para denunciar a prohibición de mercados labregos | onda cero

Na última semana, houbo varios concellos que decretaron unilateralmente o peche dos seus mercados de alimentos labregos (Melide, Cambre...), adoptando unha decisión que, sen dúbida, pode contribuír a incrementar os contaxios por dúas razóns: En primeiro lugar, está demostrado que son máis seguras as actividades ao aire libre, onde habitualmente se celebran este tipo de feiras alimentarias; que en recintos pechados como supermercados. Ademais, mentres que nos primeiros non existe contacto entre os consumidores e os produtos até que se fai a compra, nos segundos é imposibel controlar a manipulación dos produtos nos andeis por quen queira tocalos ou manosealos. En segundo lugar, nas localidades onde se decretou a prohibición, estase forzando ás persoas que facían a compra en mercados labregos a acudir aos supermercados, incrementándose o aforo destes e, polo tanto, os riscos de contaxio por aglomeración.

Dende o SLG non entendemos a fixación dalgúns gobernos municipais por entorpecer e prohibir a venda directa de alimentos cando, ademais, se trata de produtos de primeira necesidade cuxa circulación está protexida polas autoridades comunitarias e estatais en tempos de crise. Ademais, nin sequera existe unha orde oficial, nin do Goberno do Estado nin da Xunta, que obrigue a pechar estes mercados de alimentos. Se a lóxica é a de reducir a incidencia de contaxio, daquela deberían pechar os supermercados, pois o perigo de contaxio é maior neles. Obviamente, aducirase que se debe garantir o fornecemento de bens de primeira necesidade á poboación: Pois, precisamente, iso é o que fan os mercados labregos que, ademais, venden produtos de cercanía, favorecendo o desenvolvemento económico local e, especialmente, o rural. Por iso, esiximos que non se force a aquelas persoas que elixe mercar produtos locais a ir aos supermercados e que se garanta a súa libre elección á hora de consumir produtos labregos de cercanía.

Dende o Sindicato Labrego Galego, estamos estudando a posibilidade de organizar accións de protesta e de desobediencia civil para denunciar unha prohibición que non se pode xustificar dende ningún punto de vista, ao tempo que os nosos servizos xurídicos traballan na elaboración dunha demanda legal polos riscos sanitarios que supoñen estas prohibicións e por impedir o desenvolvemento dunha actividade que se debe garantir en tempos de crise, tal e como ordena explicitamente a Unión Europea nas súas instrucións para facer fronte á Covid 19.