Ourense Provincia

Acisclo Manzano recibirá o 17 de xuño a Medalla de Ouro da provincia

O escultor expresou por adiantado o seu agradecemento por unha medalla que, dixo, “está entre as distincións máis coñecidas que recibín”

Óscar Gómez

Ourense | 09.06.2022 11:05

Acisclo Manzano recibirá o 17 de xuño a Medalla de Ouro da provincia
Acisclo Manzano recibirá o 17 de xuño a Medalla de Ouro da provincia | onda cero

O presidente da Deputación de Ourense, Manuel Baltar, visitou no mosteiro de Santa María de Xunqueira de Espadanedo ao escultor Acisclo Manzano, que o vindeiro 17 de xuño recibirá a Medalla de Ouro da provincia nun acto no salón de plenos do Pazo Provincial que comezará ás 11,30 horas. Un merecido recoñecemento, sinalou o presidente do goberno provincial, “por toda unha vida creando e crendo nesta terra, facendo ademais da súa obra a mellor tarxeta de visita do noso territorio”.

un dos grandes da cultura e da historia de Ourense

“Ninguén mellor para recibir esta distinción”, dixo Manuel Baltar en alusión “a un dos grandes da cultura e da historia de Ourense”, desexando que manteña por moitos anos a súa constante creación para que “as próximas xeracións poidan seguir presumindo de Acisclo”.

O escultor expresou por adiantado o seu agradecemento por unha medalla que, dixo, “está entre as distincións máis coñecidas que recibín”, lembrando así a súa condición de académico numerario da Real Academia de Belas Artes ou a medalla nacional de Arte Xuvenil. “A escultura secuestroume”, confesouse o artista para recoñecer a influencia que tivo a arte na súa vida, destacando tamén o atractivo que exerceu sobre a súa persoa unha paraxe como a de Xunqueira de Espadanedo.

Manuel Baltar e Acisclo Manzano, acompañados polo alcalde, Carlos Gómez, visitaron o mosteiro de Santa María, onde o escultor deixou a súa pegada por partida dobre. Por unha banda participou nos recentes traballos de restauración do cenobio elaborando dúas tallas incorporadas ao artesonado do coro. Ademais, no propio mosteiro pode contemplarse unha exposición de obras figurativas cedidas polo artista.

Manuel baltar
Manuel baltar | ona cero

Recoñecemento “aos mellores fillos da terra ourensá”

A Deputación de Ourense iniciou en agosto de 2019 o expediente para outorgar a medalla de ouro da provincia ao escultor, logo de que Manuel Baltar anunciara un mes antes na Insua dos Poetas, durante a celebración da XI Festa da Palabra, que proporía ao artista para a máxima distinción que concede a institución “aos mellores fillos da terra ourensá”. Un galardón reservado para as persoas que acaden un gran prestixio social no eido que desenvolven a súa actividade, contribuíndo á mellora da imaxe da provincia de Ourense e o coñecemento sobre a mesma.

Acisclo Manzano (Ourense, 1940) é considerado como un dos grandes escultores contemporáneos españois. Membro da Real Academia de Belas Artes na sección de escultura, medalla nacional de Arte Xuvenil e Premio Otero Pedrayo, o artista ourensán ten traballado a madeira, o bronce, ferro ou granito, aínda que a súa obra céntrase no barro, material que utiliza para modelar as súas formas escultóricas. A súa obra atópase repartida por numerosas localidades galegas, con mostras no Museo de Belas Artes da Coruña, na colección de arte de Abanca e no xa citado mosteiro de Xunqueira de Espadanedo.