El 2 y 3 d’abril l'asociación cultural piloñesa “Les Ablanes” organiza por segundu añu consecutivu les Xornaes de la Memoria Histórica, que tienen por títulu “Desenterrando la Historia. Memoria, represión y llucha n’Asturies del sieglu XX”. Estes xornaes foron entamaes l’añu pasáu xunto cola asociación cultural “Reflexu” y van tener llugar en L’Infiestu el 2 y 3 d’abril, onde organizarán varies ponencies y actividaes pa tolos públicos.
El sábadu 2, a les 10.30 la mañana, la casa cultura de L’Infiestu va acoyer en primer llugar la proyeición: “A golpe de tacón”, un curtiumetraxe dirixíu por Amanda Castro qu’amuesa los acontecimientos venceyaos a la fuelga minera de 1962 pa que darréu, a les 11.00, Anita Sirgo, protagonista de dicha fuelga, nos cuente’l so rellatu. A les 12.30 tendrá llugar la presentación del llibru “Mi infancia en el franquismo. Tiraña, Asturies, 1938”. Trátase d’un diariu escritu por Enesida García Suárez onde da a conocer la so experiencia demientres los años de dictadura. Intervendrán nesta segunda ponencia, Yerba Segura Suárez, autora del epílogu, y Mª Isabel García García, fiya d’Enesida.
El mesmu día, a les 18.00 de la tarde, y nel mesmu llugar, presentaráse la novela gráfica “Cumbres en pie de Guerra. Sobre la batalla del Mazucu”, cola presencia del autor, Guillermo Menéndez Quirós que va falar del so procesu creativu y de la documentación a la hora d'ellaborar la so obra. Y a les 20.00, pa finar la xornada del sábadu, va dase pasu a la parte más artística de les xornaes: na Cervecería la Traviesa tendrá llugar un recital de poesía a cargu d'Antonio Díez y un conciertu ofrecíu por “Ún de Grao”.
Ruta guiada
Les xornaes finarán el domingu 3 d’abril, con una ruta guiada a la Fuexa Común de La Reboria. Sedrá a les 12.30 de la mañana, onde l'arqueóloga Irene Faza falará sobre les buelgues que la guerra y la represión dexaron nel paisaxe y l'historiador Jose Antonio Longo fadrá un percorríu históricu del llugar. Pa finar la ruta, el cantante piloñés de canción asturiana Ismael Tomás, interpretará dalguna tonada na propia fuexa.
