ondacero.es
Ourense | 11.12.2018 08:07
Os establecementos hoteleiros de Ourense acadaron unha ocupación do 80% durante a pasada ponte de decembro. Así o sinala o balance provisional realizado polo Clúster de Turismo de Galicia nuns datos que amosan unha vez máis a importancia destas datas na nosa demanda turística, especialmente no turismo urbano, o turismo rural e as escapadas de última hora.
Este primeiro balance basease en valoracións proporcionadas por representantes do sector, principalmente do ámbito hoteleiro, que ofrecen unha visión aproximada á espera dos datos definitivos. O resultado confirma as previsións esperadas nunha ponte que tradicionalmente funciona ben, malia que nesta ocasión unha das xornadas festivas coincidiu en fin de semana.
Segundo o sector, ao 80% de ocupación media na capital, engádese o 70% rexistrado na Ribeira Sacra. En xeral, os datos da provincia superan, así mesmo, o 50% de ocupación.
A desestacionalización da chegada de visitantes é precisamente un dos retos polos que traballa a Estratexia do Turismo de Galicia 2020, o documento impulsado pola Xunta froito da colaboración público-privada. Así, trátase de poñer en valor, dun xeito sustentable, unha oferta atractiva durante todo o ano a través de experiencias vencelladas a recursos propios como o termalismo, a natureza, o patrimonio, o enoturismo ou o turismo activo, entre outros.