O Concello de Caldas de Reis anunciou este mércores unha das citas máis destacadas das Festas de San Roque: o concerto gratuíto de Ortiga, o proxecto musical do santiagués Manuel González, acompañado pola Banda de Música Municipal da vila. A actuación terá lugar o 15 de agosto e promete ser unha experiencia musical “única e inesquecible”, segundo destacou o tenente de alcalde e concelleiro de Cultura e Festexos, Manuel Fariña.
O evento, que constará de 21 temas, contará cos arranxos do compositor Andrés Álvarez, quen adaptará as melodías electrónicas características de Ortiga ao formato instrumental da banda. “Vai ser unha forma totalmente novidosa e única para o público”, explicou Álvarez.
O director da Banda Municipal, Javier Penido, expresou a ilusión da agrupación por participar neste proxecto: “Será un auténtico bombazo. A xente vai ter ocasión de escoitar a Ortiga de maneira totalmente distinta e para nós é unha honra formar parte desta proposta”.
Fariña subliñou que esta colaboración representa unha oportunidade única para os mozos e mozas da banda de compartir escenario con unha das figuras máis relevantes da música galega actual. Ademais, augurou que o concerto será “un dos mellores momentos das festas” e un importante atractivo turístico para a vila.
A Banda Municipal de Caldas de Reis vén de acadar importantes éxitos nos últimos anos, entre eles o seu recoñecemento no Certame Ciudad de Valencia, considerado “a Champions League das bandas de música”, segundo o edil.
