Educación

Galiciencia, promovida polo Parque Tecnolóxico de Galicia, celebrarase en decembro

Baixo o lema “A innovación do futuro”, será online debido ás restricións provocadas pola actual situación sanitaria

Óscar Gómez

Ourense | 06.11.2020 11:45

Galiciencia, promovida polo Parque Tecnolóxico de Galicia, celebrarase en decembro
Galiciencia, promovida polo Parque Tecnolóxico de Galicia, celebrarase en decembro | onda cero

O Parque Tecnolóxico de Galicia -Tecnópole- promove desde o ano 2006 Galiciencia, a maior feira científica que se celebra na nosa comunidade e que busca achegar a ciencia á sociedade, en particular aos máis novos. Conta co apoio da Consellería de Economía, Empresa e Innovación, a través da Axencia Galega de Innovación (Gain).

Esta 15ª edición, que terá lugar no vindeiro mes de decembro, será online, debido ás restricións provocadas pola actual situación sanitaria. “Esta nova fórmula representa unha oportunidade para facer Galiciencia máis grande, inspiradora, creativa, participativa e aberta a proxectos de todo o ámbito nacional, chegando así a máis moz@s entusiastas da ciencia, a innovación e a tecnoloxía” -indica o director xerente de Tecnópole, Ricardo Capilla. Salienta que “Galiciencia supón un importante estímulo para a creatividade e o talento para innovar dos máis novos, permitíndolles achegarse á ciencia a través do xogo e a creación e contribuíndo a espertar neles as vocacións científicas”.

Este certame científico diríxese a estudantes de Primaria, Secundaria, FP e Bacharelato. Nesta edición, que se celebrará baixo o lema “A innovación do futuro”, amosarase cara a onde camiña a innovación, cales serán os recursos e procesos que se utilizarán para levar a cabo esa innovación, en que ámbitos da vida se desenvolverá máis e que melloras proporcionará á sociedade ou mesmo as desvantaxes que pode supor.

Premio especial para o mellor proxecto liderado por unha rapaza ou para o mellor traballo relacionado co fomento da igualdade na contorna da I+D+i

Os rapaces xa poden enviar os seus proxectos a www.galiciencia.online. Desde Tecnópole agardan “propostas imaxinativas, proxectos innovadores e novas ideas por parte do alumnado participante”; que, como en feiras anteriores, complementaranse con actividades, talleres, espectáculos de ciencia e desafíos, que versarán tamén sobre a innovación do futuro.

Equipos de Secundaria, Bacharelato e FP competirán polo premio final do certame e fóra de competición poden participar estudantes de Primaria e Educación Especial. Como

principal novidade nesta edición, en consonancia coa temática deste ano e coa actividade de Tecnópole de promoción do STEM feminino, o premio especial da Galiciencia 2020 será para o mellor proxecto liderado por unha rapaza ou para o mellor traballo relacionado co fomento da igualdade de xénero na contorna da I+D+i.

Pasaporte a outras feiras

Os participantes na competición de proxectos da Galiciencia buscarán situarse entre os tres finalistas. O que consiga a maior puntuación levará o primeiro premio, dotado con 1.000 euros para financiar a súa participación na maior feira científica a nivel estatal, Exporecerca, que se celebra anualmente en Barcelona.

O segundo equipo clasificado recibirá un apoio económico de 500 €, o que lles permitirá participar na Zientzia Azoka, a feira de ciencia que ten lugar cada ano en Bilbao. Pola súa parte, o equipo gañador do terceiro premio recibirá 200 € para participar no programa de actividades organizadas polos Museos Científicos Coruñeses con motivo da Semana da Ciencia.

Máis información: www.galiciencia.com / www.galiciencia.online.