. O PSdeG-PSOE solicitou por rexistro a comparecencia urxente de Manuel Baltar en comisión, para que explique o uso de millóns de euros públicos da Deputación Provincial de Ourense, co único fin de mercar alcaldes doutras formacións para as filas do PP. Os socialistas aseguran que “por parte do presidente da Deputación se están levando a cabo diversas operacións de captación de alcaldes e alcaldesas doutras formacións políticas, para ser candidatos ou candidatas do Partido Popular nas próximas eleccións municipais”, que entre outras cuestións “decidirán quen será o próximo presidente da Deputación”. Os socialistas recordan que esta practica de untar rexedores ou rexedoras con promesas para que fichen polo PP, xa a puxeron en práctica os conservadores en anteriores procesos electorais. Mandatarios e mandatarias de municipios que, casualmente, durante o mandato foron regados con centos de miles de euros extraordinarios que outros concellos non recibiron. “Estes comportamentos atentan contra os principios democráticos máis básicos e contra códigos de ética pública como é o Pacto Antitransfuguismo, que permitiu introducir reformas legais para loitar contra estes comportamentos”, sinalan desde o PSdeG-PSOE na súa solicitude. E, por iso demandan que Baltar expoña con detalle este uso fraudulento dos euros públicos de todos e todas, e compareza na vindeira comisión provincial informativa de Transparencia e Administración que terá lugar durante a tarde do mércores 13 de febreiro de 2019, para “dar conta do uso de recursos desta entidade na captación de candidatos/candidatas para a súa formación política, de outros alcaldes e cargos públicos electos doutras forzas políticas, e do cumprimento do Pacto Antitransfuguismo” por parte da Deputación de Ourense.