A Policía Local contará con nove novos efectivos máis
"O ideal é que o persoal conte con 150 axentes" en palabras do alcalde de Ourense, Gonzalo Pérez Jácome. Actualmente cóntase con 90, pero coas xubilacións anticipadas poderíanse perder até 18 efectivos nos vindeiros meses
O alcalde de Ourense, Gonzalo Pérez Jácome, recibiu esta mañá no salón de plenos os novos policías locais en prácticas cos que contará o Concello de Ourense. Estes nove efectivos, que deberán superar o proceso formativo en réxime de prácticas, non se incorporarían ao corpo municipal até o inicio de 2020, cando poderían tomar posesión do cargo.
O alcalde de Ourense animou os novos axentes para que poidan incorporarse ao corpo canto antes debido ao déficit de axentes cos que conta a cidade. Nestes momentos, existen 90 policías, mandos incluídos. Pero entre xubilacións e xubilacións anticipadas, Ourense podería sufrir a baixa de até 18 axentes, o dobre dos que se incorporarían.
Así mesmo, o alcalde manifestoulle o seu agradecemento á Policía Nacional por acoller de bo grado, na Xunta Local de Seguridade celebrada a pasada semana, a proposta de aceptar parte das tarefas administrativas de denuncias que actualmente asume a Local.
